কবিতা : ক'ত পাবা সেই মনালিছা হাঁহি

ক'ত পাবা সেই মনালিছা হাঁহি
--লক্ষ্মণ কুমাৰ

ক'ত পাবা সেই মনালিছা হাঁহি
জীৱন নৈয়েদি উজাই গলেই দেখিবা
কেঁকুৰিয়ে কেঁকুৰিয়ে কিমান মৰাসুঁতি

কিমান ঢৌৱে কঁপাই তোলে
এখন শান্ত শীতল বুকু!

সময়ৰ আঁচল ধৰি
ঘাটে ঘাটে চকুপানীবোৰ এৰি আহিলেও
মুখত সেই একেই আৰ্টিফিচিয়েল হাঁহি

ক'ত পাবা সেই মনালিছা হাঁহি

দুখৰ দিনলিপি লিখি লিখিও
যি ভাগৰি পৰা নাই
সৰি পৰা নাই হাতৰ মুঠিৰ পৰা
গোলাপৰ পাহি
তেওঁৰ মুখতেই বিচাৰি পাবা সেই মনালিছা হাঁহি
........................................................
["অসমীয়া প্ৰতিদিন কাকতত প্ৰকাশিত"]