" আপোনাৰ আৰু মোৰ মাজত এক অদেখা সম্পৰ্ক......"
আপোনাৰ আৰূ মোৰ মাজত
এক অদেখা সম্পৰ্ক
শব্দই যাৰ যোগসুত্ৰ....
শব্দবোৰ কিমান মধূৰ হ'লে
অনুভৱবোৰে হৃদয়ৰ কাষ চাপে
মই নাজানো...!!
মই মাথো শব্দৰে সাজিব খোজো
আপোনাৰ বুকুত
এটা ঘৰ..,
য'ত মোৰ স্পৰ্শহীন, অঘৰী.. অনুভৱবোৰে
ক্ষন্তেকৰ বাবে হ'লেও
শান্তিৰে জিৰনি ল'ব পাৰে....
জানে, হৃদয়ে যেতিয়া কান্দে
শব্দবোৰে মোৰ আঁঙুলিত নাচে
চকুপানীবোৰক
অনুভৱৰ কলমত ঢালি লৈ
যেতিয়া মই লিখি যাওঁ
মোৰ অসংলগ্ন ভাবৰ স্বৰলিপি
আপুনি হয়তো তাত
বিচাৰি নাপাব পাৰে
শ্ৰুতিমধূৰ শব্দসজ্জা...
তাৰবাবে মোক দুখ নিদিব'
অনুভৱবোৰে যে
মোৰ কল্পনা শক্তিক
অ'কনো কষ্ট নিদিয়াকৈয়ে
যি পায় তাকেই পিন্ধি বাট লৈ
আপোনাৰ মনৰ পদূলিলৈ.....
কি বাস্তব... কি অবাস্তব...
কি সত্য, কি অসত্য...
মই নাজানো
মই জানো মাথো
মোৰো বুকুত আছে
আপোনাক ক'ব পৰাকৈ
কিছুমান অপ্ৰকাশিত তথ্য
অলিখিত কথাবোৰ...
নোকোৱা কথাবোৰ..,
বুকুত যেতিয়া ভিৰ কৰে
তেতিয়া যন্ত্ৰনাত ছটফটাই উঠো মই
কিন্তু, কিয়েইবা কৰিব পাৰো মই
কোনেইবা বুজিব মোৰ এই যন্ত্ৰনা
বুকুৰ ভিতৰৰ বিধস্ত ৰূপ যে
দুচকুত জিলিকি নুঠে...!!
মই জানো,
আপুনি নিশ্চয় বুজিব মোৰ অনুভৱক
আপোনাৰ সৈতে যে
আছে মোৰ এক অদেখা সম্পৰ্ক
শব্দই যাৰ যোগসুত্ৰ ।।
